Kuleli sonto ikhuza ibuya i-UEFA Champions League esiyigcine ngonyaka odlule. Ngemuva kwemidlalo yamaqoqo, sesidlulela kwi-last 16. Omacaphuna kusale iReal Madrid nePSG bazobhekana namhlanje, kanti kusasa kunomunye umdlalo omkhulu phakathi kwe-Inter neLiverpool. Asikuthathe sikubeke.
NgoLwesibili 15 February
19/20 PSG | Draw 26/10 | Real Madrid 51/20 (22:00)
Kuzochitheka izishebo uma sekuhlangene lezi ziqumama zase-Europe. Kuningi okuzoshubisa lomdlalo phakathi kwePSG neReal Madrid uma ubuka umlando wabo muva nje. Omabili lamaqembu aqhwakele ezicongweni kumaligi agijima kuwo.
IPSG iphethe umdlali osekucacela ngisho ingane encane ukuthi uzobe egijima kwiMadrid ngesizini ezayo, uKylian Mbappe. IPSG ngakolunye uhlangothi iphethe isitha esidala seMadrid, uLionel Messi. Lo mdlali wase-Argentina unamagoli awu-26 emdlalweni ewu-45 ebhekene neMadrid. Ngesikhathi egcina ukubhekana kwi-last 16 lawa maqembu iMadrid yanqoba ngo 5-2.
Emidlalweni eyisithupha bebhekene iMadrid inqobe kathathu, iPSG yanqoba kanye badlala ngokulingana kabili. Noma kunjalo, ngibona iPSG iwunqoba umlenze wokuqala.
7/1 Sporting | Draw 42/10 | Man City 7/20 (22:00)
Umdlalo engilindele ukuthi ungabi lula kakhulu kwiManchester City. Abaningi bayazi ukuthi iManchester City ivame ukuwabhudluza ngenqwaba yamagoli amaqembu ‘amancane’ kodwa indlela ngeke ibe lula.
ISporting muva nje izivezile ukuthi izimisele ukulwa kule sizini ijulukisa iFC Porto kabi emdlalweni weligi ogcine uphele ngo 2-2. Kuyimanje leli qembu lisembangweni wesicoco ePortugal nayo iFC Porto ebashiya ngamaphuzu ayisithupha kuphela. IManchester City ngakolunye uhlangothi imatasa ikhombisa amaqembu ukuthi ayimdingi kanganani umgadli njengoba abadlali bayo bezenzela phambi kwepali kwiPremier League.
Ngempelasonto uRaheem Sterling ushaye ihattrick, nobedlala indawo yomgadli osabisile uPhil Foden naye uphume negoli. Ingozi ngeCity ukuthi amaqembu awazi ukuthi amake ba, ayeke ba, ngoba ngisho nabadlali basemuva bayayidabula inethi uma kuvela isikhala. Ngibona iCity iwunqoba lo mdlalo, kodwa ngeke kube lula!
NgoLwesithathu 16 February
47/20 Inter Milan | Draw 51/20 | Liverpool 11/10 (22:00)
I-Inter Milan kuzomele ilande wonke amandla esanawo ukuze inqobe lo mdlalo. Lokhu ngikusho ngoba ngempelasonto ompetha base-Italy bebenomdlalo onzima bebhekene neNapoli, ogcine uphele ngo 1-1.
Ngaphambi kwalowo mdlalo, bebedlala ne-AC Milan emdlalweni abadliwa kuwo ngo 2-1. ILiverpool ingelinye lamaqembu odinga ukuthi udlale nalo unomfutho wonke kungenjalo lizokugijimisa uze uyophela umdlalo.
Ngaphezu kwalokho, ziyabuya izinkinga zabadlali uMoh Salah noSadio Mane ongalindela ukuthi bawuqale umdlalo kulandela ukudlala kwi-Africa Cup of Nations. Ngilindele ukuthi omabili amaqembu alibasele enethini, kodwa ngibona iLiverpool iyiginqa i-Inter.
33/20 Villareal | Draw 43/20 | Juventus 7/4 (22:00)
IJuventus mhlawumbe yayihleka yodwa iqhathwa neVillareal, engelinye lamaqembu ‘amancane’ asasele kwi-UCL. Nokho iVillareal kule sizini kwiLa Liga ingelinye lamaqembu adlala kangcono noma ingasondele kakhulu kumaqembu alwela isicoco.
Isele ngamaphuzu amathathu kuphela kwiBarcelona ekunombolo 4 kanti muva nje isanda kubamba iqembu elisesicongweni iReal Madrid.
Kuma group stages iVillareal ikwaze ukudlula iqhathwe neManchester United ne-Atalanta yase-Italy, esanda kudlala ngokulingana neJuventus. Ngilindele ukuthi kube wumdlalo ozoba namagoli angaphansi kuka-2.5 nokuthi zidlale ngokulingana.
