Kuzobancane indawo kuma ligi ase-Europe kule mpelasonto njengoba kuzongqubuzana amaqembu amakhulu. IGibela Sport ihlaziye imidlalo emihlanu okumele uyiqaphe kule mpelasonto.
Kuzobancane indawo kuma ligi ase-Europe kule mpelasonto njengoba kuzongqubuzana amaqembu amakhulu, amanye asembangweni weligi kanti amanye azama ukuzibekisela indawo kwi-UEFA Champions League yangesizini ezayo. Namuhla e-Italy sinomdlalo oshisayo ophakathi kweNapoli neJuventus. KwiPremier League kunemidlalo yabakhaya eshubile, kanti nakwiLaLiga kuzongqubuzana iReal Madrid neBarcelona kowamanqamu weSupercopa.
Nakuleli sizohlaziya umdlalo we-Orlando Pirates neGolden Arrows.
NgoLwesihlanu
Serie A | 1/1 Napoli | Draw 24/10 | Juventus 29/10 (21:45)
INapoli iyiqale kahle isizni ka-2022/2023 yeSerie A inqoba imidlalo ewu-14 kwengu-15 ngaphambi kwekhefu leFIFA World Cup ebiseQatar. Leli qembu liye ekhefini lingayazi induku kodwa lithe libuya nje lashaywa okokuqala libhekene ne-Inter Milan. Ngemuva komdlalo umqeqeshi weNapoli wavuma ukuthi ikhefu kungenzeka ukuthi libehlisele umgqigqo, kodwa ngempelasonto edlule ibuye ne-win ishaya iSampdoria ngo 2-0.
Uma iNapoli izimisele ngokunqoba iScudetto, eyasigcina ngo-1990, kuzomele ishaye amaqembu amakhulu kwiSerie A kule sizini. IJuventus isele ngamaphuzu ayisikhombisa kwiNapoli, nayo izama ukunqoba isicoco seligi abasigcina ngesizini ka-2019/2020.
Tip: INapoli izoyibuyisela kwamhlaba iJuventus, ngibona iyishaya ngamagoli amabili kuya phezulu.
NgoMgqibelo
Premier League | 3/1 Man United | Draw 28/10 | Man City 17/20 (14:30)
Amehlo abathandi bebhola azobe ethe njo kumdlalo wabakhaya baseManchester ose-Old Trafford. IMan City izovakashela i-United iphuma endukwini phakathi nesonto njengoba igqemeke engeqiwa ntwala iwashiswa umjezi yiSouthampton kuma-quarterfinals eCarabao Cup. Indlela iCity edlale ngayo icasule umqeqeshi uPep Guardiola oyalele abadlali bakhe ukuthi bazoshaywa uma bezodlala ngendlela abadlale ngayo uma sebebhekene ne-United.
ICity nyakenye ngo-October ixebule iRed Devils ngo 6-3 e-Etihad Stadium kwancane indawo, nokwenza abaningi bakholwe wukuthi izonqoba kalula nakulokhu. Kuningi osekushintshwe wumqeqeshi weMan United u-Erik ten Hag nokho uma uqhathanisa iqembu elalidlala ngalolo suku neqembu eselivame ukudlala manje.
Tip: Uma iwuqale kahle lo mdlalo i-United ithole negoli esiwombeni sokuqala, ingabuya namaphuzu aphelele, kodwa iCity inomkhuba wokujikelana esiswini njengotshwala ngakho isangasidedela isibhaxu la. Ngizoncika ku-both teams to score.
DStv Premiership | 6/10 Orlando Pirates | Draw 51/20 | Golden Arrows 48/10 (15:30)
I-Orlando Pirates izoya kulo mdlalo idinga i-win kwazise isisuthe induku kathathu kulandelana kwiDStv Prem. IBucs ibhekene nenkinga yendlala yamagoli njengoba isavalele amagoli ayishumi kuphela emdlalweni ewu-15. Ngaphezu kwalokho iPirates inerekhodi elibi lokungayishayi inethi esiwombeni sesibili kule sizini. Ukuxazulula le nkinga, iBucs ilande umqeqeshi wabagadli e-UK, kule mpelasonto amehlo azobe enkanke umbombo abalandeli belindele ukubona izithelo zomsebenzi wakhe.
IGolden Arrows ayikho lula neze noma isanqobe kahlanu kule sizini. Iqembu eliphekwa wuVusumuzi Vilakazi noMabhudi Khenyeza selivalele amagoli awu-17 emdlalweni ewu-15.
Tip: Angilindele amagoli amaningi kulo mdlalo kodwa ngilindele ukuthi iPirates ingavumi ukushaywa kane kulandelana. Double chance: Pirates win or draw.
NgeSonto
Premier League | 22/10 Tottenham | Draw 51/20 | Arsenal 12/10 (18:30)
Omunye umdlalo olindelwe ngabomvu kule mpelasonto yiNorth London Derby ephakathi kwe-Tottenham ne-Arsenal. Ama-Gunners ayandiza kwiPremier League futhi abaningi bakholwa ukuthi ngeyawo le sizini. I-Arsenal isashaywe kanye isizini yonke kwiligi, izovakashela iTottenham inethemba lokugwema induku eyayithola ngesizini edlule. Iqembu lika-Antonio Conte kule sizini linenkinga yokukhuphula umfutho esiwombeni sesibili, kwesinye isikhathi selingemuva ngamagoli. Yinto okuzomele lizame ukuyigwema kulo mdlalo uma lingafuni ukushaywa.
Tip: Kulo mdlalo iqembu elisekhaya livame ukunqoba, angilindele ukuthi kujike lokhu. IWin ngizoyinikeza iTottenham kodwa uma uyisaba i-Arsenal ngena kwimakethe ka over 1.5 goals.
LaLiga Supercopa | Real Madrid vs Barcelona (21:00) (odds: TBC)
I-El Classico yokuqala onyakeni! Kuzobancane indawo eKing Fahd Stadium, eSaudi Arabia, njengoba kuzotheleka abadlali beReal Madrid neBarcelona bezongqubuzana kumdlalo wamanqamu weSupercopa (Super Cup).
Kumdlalo wokugcina phakathi kwalawa maqembu iMadrid yanqoba ngo 3-1. Kwakuwumdlalo weligi kodwa lowo, futhi iMadrid yayisekhaya. Kulokhu basezweni langaphandle futhi kudlalelwa inkomishi. Omabili amaqembu aya kulo mdlalo equkethe izethenjwa, ngakho akekho ozocasha ngesithupha ngemuva komdlalo. Ukukhishwa kweBarca kwiChampions League ekuseni kule sizini sekuyifakele ugqozi lokuthi ifune ukushanela kwasani ewumqhudelwano phambi kwayo.
Tip: Kungenzeka noma yini kulo mdlalo, ungaphela zibambene ugcine uye kuma-penalty, kodwa ngizohamba ne-win yeBarcelona ngenxa yendlela edlale ngayo ibhekene ne-Atletico Madrid muva nje.
