Amaligi amakhulu e-Europe ahlaba ikhefu ngempelasonto kodwa ikhona eminye imidlalo ongayiqapha.
Amaligi amaningi ebhola e-Europe ahlaba ikhefu ngenxa yezizathu ezihlukene kule mpelasonto kodwa ikhona eminye imidlalo yebhola ezobe iqhubeka. Kunamazwe azobe eqedela imidlalo yokuhlungela indebe yoMhlaba, i-AFCON isaqhubeka, kanti akhona namanye amaligi azobe enemidlalo njenge-EFL Championship. Asikuthathe sikubeke:
NgoLwesihlanu
29/20 Chile | Draw 18/10 | Argentina 19/10 (2:15 ekseni)
I-Argentina izoya kulo mdlalo ngaphandle kukaLionel Messi wePSG, osanda kubuya ekudlaleni kulandela ukuxinwa yiCovid-19. Kuzobe kuwumdlalo wokuqala wokuhlungela indebe yomhlaba i-Argentina idlala ngaphandle kwakhe.
Uma inqoba izosala ngamaphuzu amathathu kuphela kwiBrazil ehleli esicongweni ngamaphuzu awu-35. Lo mdlalo ngeke ube lula nokho kwazise iChile isekhaya futhi iwafuna la amaphuzu ukuze ikhuphukela endaweni yesine. EQatar kuzoya kuphela amaqembu akwi-top 4, elisihlanu lizoqhathwa nelinye lase-Asia. Noma isanqobe kanye emidlalweni ewu-16 ibhekene ne-Argentina, ngibona iChile iwunqoba lo mdlalo noma uphela nge-draw ngenxa yendlela edlala ngayo ekhaya.
27/20 Huddersfield | Draw 23/10 | Stoke 2/1 (21:45)
Kwi-EFL Championship siqala ngomdlalo ophakathi kwamaqembu amabili abheke ukuzibekisela indawo kuma-play off okungena esigabeni esikhulu sebhola eNgilandi, iPremier League. IHuddersfield izofika kulo mdlalo inefomu elihle kwazise emidlalweni emihlanu edlule inqobe kathathu yadlala ngokulingana kwemibili.
IStoke City inemiphumela engemihle kakhulu emidlalweni emihlanu edlule njengoba ishayiwe kwemithathu, yadlala ngokulingana kowodwa, yadliwa kowodwa. Lawa maqembu ayalingana nge-goal difference kanti into ecacayo ukuthi womabili anokuvuza emuva. Lindela umdlalo ozoba namagoli nokuthi inqobe iHuddersfield.
NgoMgqibelo
26/10 Barnsley | Draw 24/10 | Bournemouth 1/1 (17:00)
IBournemouth izofika kulo mdlalo inogqozi lokujika izinto kulandela ukudliwa emidlalweni emibili edlule osekuyinciphisele amathuba okudla isicoco se-EFL Championship.
Isele ngamaphuzu ayisishiyagalombili kwiFulham ehleli esicongweni. Izindaba ezinhle wukuthi babhekene neqembu eliwukudla kwenduku. IBarnsley isanqobe kabili emdlalweni ewu-25, ibukeka izimisele ngokugawulwa yizembe. Ngibona izigwazela ibhece iBournermouth kulo mdlalo.
7/20 Fulham | Draw 4/1 | Blackpool 7/1 (17:00)
IFulham izozama ukuqhubeka nomgqigqo wayo wakamuva uma isibhekene neBlackpool. Leli qembu laseLondon liqhwakele itafuleni le-EFL Championship futhi libukeka seliphakathi kwiPremier League ngesizini ezayo kodwa kusangenzeka noma yini.
IBlackpool ngakolunye uhlangothi nayo iza nomgqigqo omuhle kulo mdlalo njengoba inqobe imidlalo emibili ilandelana, futhi izozama ukungashaywa ukuze ingasali kakhulu emaqenjini afuna ukungena kuma-playoff uma kuphela isizini. Noma kunjalo, ngibona iFulham iwunqoba lo mdlalo.
3/1 Burkina Faso | Draw 16/10 | Tunisia 11/10 (21:00)
IBurkina Faso izobhekana nezwe elikhalise abaningi liwashisa iNigeria umjezi kusalindelwe lukhulu kuyo kwi-AFCON 2021.
IBurkina Faso ifike kwi-last 16 ngokunqoba umdlalo owodwa nangokudlala ngokulingana komunye, yadliwa kowodwa.
NeTunisia ifinyelele kulesi sigaba inamaphuzu amathathu kuphela kodwa yazikhombisa ukuthi iqinile ngokushaya iNigeria kwi-last 16.
Ngilindele umdlalo oshubile phakathi kwalawa maqembu ngoba abukeka elingana, kodwa ngibona iBurkina Faso iyifaka induku iTunisia.
6/10 Cercle Brugge | Draw 31/10 | Oostende 42/10 (21:45)
Iqembu elisekhaya selinqobe imidlalo emine edlule ilandelana, lizozama ukushaya i-Oostende eyayidlalelwa wu-Andile Jali.
ICercle ingelinye lamaqembu awuvule kahle u-2022 kanti izobe ibheke ukuzisondeza namaqembu azongena kuma-playoff e-Europa League ngesizini ezayo. I-Oostende isanqobe kanye emidlalweni emihlanu edlule.
Ngibona liwunqoba kalula lo mdlalo iqembu elisekhaya.
7/10 Venezuela | Draw 22/10 | Bolivia 37/10 (00:00)
IBolivia ingelinye lamazwe asanethuba lokuzibekisela indawo kwiNdebe yoMhlaba. Isele ngamaphuzu amathathu kuphela kunombolo 4 ozobathatha ubababeke eQatar.
Leli qembu linamagoli inkinga linokuvuza emuva okulenzela phansi, kodwa kulo mdlalo lizobe libhekene neVenezuela evuza njengalo futhi esanqobe kabili kuphela emidlalweni ewu-14.
Ngilindele ukuthi omabili amaqembu akore kodwa ngibona iBolivia ibuya naphelele.
NgeSonto
11/10 Union Saint-Gilloise | Draw 51/20 | Anderlecht 47/20 (14:30)
I-Anderlecht izovakashela i-Union Saint-Gilloise emdlalweni okumele iwunqobe uma isafuna ukuba nethuba lokudla isicoco seligi eBelgium. Ngeke kube lula ngoba isele ngamaphuzu awu-11, kodwa kusangenzeka uma beshaya i-Union, esesicongweni se-log. I-Union iyinkinga kule sizini njengoba isinqobe imidlalo ewu-17 kwengu-23, yashaywa kane. Ingqengqeleza phambili nangamagoli.
Ne-Anderlecht ayikho kude kakhulu kodwa okuyenzela phansi kule sizini ama-draw. Isashaywe kathathu kodwa yadlala ngokulingana emidlalweni ewu-9. Ngilindele ukuthi linqobe iqembu elisekhaya noma umdlalo uphele nge-draw.
1/7 FC Porto | Draw 13/2 | Maritimo 19/11 (22:30)
EPortugal iFC Porto izama ukubaleka naso isicoco seligi. Emdlalweni ewu-19 esidlaliwe ayiyazi induku, kunalokho isaqathaze amaphuzu emdlalweni emibili kuphela ephele ngokulingana.
Kulo mdlalo nokho izobe ibhekene neqembu elifomile emdlalweni edlule. IMaritimo iza kulo mdlalo inama-win amathathu emdlalweni emihlanu edlule, yadlala ngokulinga kowodwa, yadliwa kowodwa. Ngoba isekhaya iPorto, angiyiboni iginqwa yileli qembu.
